Iнтэрактыўная фотавыстава «Птушыная філармонія»

Фотавыстава “Птушыная філармонія”,

аўтар здымкаў — Іна Субоціна

Іна Субоціна — урач-нефролаг. Фатаграфіяй і назіраннем за птушкамі захапляецца з дзяцінства. У 14 гадоў сама зарабіла грошы і купіла першы фотаапарат. Удзельнічае ў экспедыцыях па пошуку рэдкіх птушак. У яе партфоліо 248 з 339 відаў птушак, заўважаных у Беларусі.

Гэтая фотавыстава з галасамі птушак — сумесны праект фатографа Іны Субоцінай і бібліятэкі Беларускага дзяржаўнага тэхналагічнага ўніверсітэта. Не будучы арнітолагам, цяжка разабрацца ў шумным птушыным шматгалоссі. Гэта паэзія і музыка жывой прыроды. Высокая, чыстая, на дзіва шматгранная, яркая, непрадказальная. І заўсёды па-дзіцячы праўдзівая. Спадзяемся, што арыенцірам для вас стане наша выстава. Каб пазнаёміцца ​​з птушыным светам, мала ведаць, дзе жыве кугакаўка барадатая, ерчык лугавы ці качка-огар. Трэба, прынамсі, паслухаць іх размовы і песні, паназіраць за штодзённай мітуснёй у іх жыцці.

Мэта выставы — прыцягнуць увагу маладых людзей да прыгажосці жывой прыроды, развіць у іх пачуццёвае ўспрыманне прыроды. Хацелася б, каб, пачынаючы са знаёмства з птушкамі на здымках, мы прыйшлі да неабходнасці абароны птушак і месцаў іх пражывання.

Іне Субоцінай удалося зняць надзвычай рэдкую птушку для нашых шырот — Арлана-даўгахвоста. Сустракаецца ў Цэнтральнай Азіі, паміж Каспійскім морам і Жоўтым морам, ад Казахстана і Манголіі да Гімалайскіх гор, Пакістана, Індыі і Бангладэш. Від знаходзіцца пад пагрозай знікнення. Гэта адзіная птушка паўночнага паўшар’я (прынамсі, драпежная), якая размнажаецца на поўдні свайго арэала зімой і мігруе на поўнач на летні перыяд. Гэты малады арлан-даўгахвост павінен быў здзейсніць вандроўку даўжынёй па меншай меры 5 тысяч кіламетраў, каб стаць сенсацыяй у Беларусі.

Пазіраваць птушкі, як і многія з нас, не любяць. Але тым цікавей атрымаліся здымкі!

Адрас: Мінск, Свярдлова 13а, 4 корпус, хол 2 паверха.
Выхадныя: субота, нядзеля.